ഫാസ്റ്റ് ട്രാക്ക്

ലാൻഡ് ക്രൂയിസറുകൾ, ഹമ്മറുകൾ..

ദുഖാൻ റോട്ടിലൂടെ അവയ്ക്കും മുമ്പേ പായുന്നുണ്ട്

മനുഷ്യർ.. 

പതിയെ ആണെങ്കിലും ട്രക്ക് നിറയെ മോഹങ്ങളും നിറച്ച്

വലതു ഓരം പറ്റി വേറെയും ജീവിതങ്ങൾ..

പാതക്കിരുവശവും

മണ്ണോടൊട്ടി കിടക്കുന്നുണ്ട് ചിലർ.

മണ്ണിൽ നിന്നും വന്നവർ..

രണ്ട് പിക്കപ്പ്‌, ഒരു നിസാൻ പാത്ത് ഫൈൻഡർ 

തിളക്കമിനിയും നഷ്ടപ്പെടാത്തൊരു ക്രൂയിസർ..

എല്ലാം മറന്നുള്ള പാച്ചിലിനിടയിലെപ്പൊഴോ 

കാലിടറിയതാവണം.

കാലമോ കാലനോ സഡൻ ബ്രേക്കിട്ടതാവണം!

വണ്ടിയൊതുക്കി ഞാൻ ഒന്നിനടുത്ത് ചെന്നു

ഉള്ളിലൊരുത്തന്റെ പ്രേതം ചതഞ്ഞിരിക്കുന്നു.

ഭൂമി വിട്ടിനിയും പോവാനാവായിട്ടുണ്ടാവില്ല.

സ്വപ്നങ്ങളും മോഹങ്ങളും കുത്തിനിറച്ച്

ലഗേജിന്റെ വെയ്റ്റ് അനുവദിക്കപ്പെട്ടതിലും കൂടിപ്പോയത്രേ..

അവനവന്റെ കഥ പറയാനുള്ള ശ്രമത്തിലാണ്.

നേരമില്ലസുഹൃത്തേ..

ഞാൻ തിരിഞ്ഞു നടന്നു.

ഭലാ ഹുവാ മേരീ...

ഖൽബിൽ നിന്നിനിയും പിടി വിടാതെ 

ആബിദ പാടുന്നുണ്ട്.

പാതക്കിരുവശവും മണ്ണൊട്ടിയവരുടെ കണ്ണുനീരാവണം 

മഴയായ് പെയ്യുന്നുണ്ട്.

കാലം സഡൻ ബ്രേക്കിടും വരെ പായട്ടെ..

വൃശ്ചികക്കാറ്റ്

വൃശ്ചികക്കാറ്റടിക്കുന്നുണ്ടത്രെ.

ഉണങ്ങിയ മട്ടലുകള്‍

തെങ്ങിനോട് വിട പറയുന്ന തിരക്കിലാവണം.

ആലിലകള്‍ കോമരങ്ങളാവും.

മുളങ്കാട്ടിൽ  കാറ്റ് താളമിടുമ്പോള്‍

കരിയിലകൾ സൂഫീ നൃത്തച്ചുവടുകളിലാവും.

പള്ളിക്കാട്ടിലെ പുൽപ്പടർപ്പുകളിൽ

കുഞ്ഞോളങ്ങൾ പിറക്കുന്നതും

ആരും കാണാതെ പരേതരെല്ലാം എഴുന്നേറ്റ് വന്ന്

ഓളങ്ങളിൽ മുങ്ങി നിവരുന്നതും 

ഞാനെന്‍റെ കണ്ണോണ്ട് കണ്ടിട്ടുണ്ട്.

മുലകുടിക്കിടെ തെങ്ങിൻ മാറിൽ നിന്നടർന്ന് വീണൊരു 

മച്ചിങ്ങക്കുട്ടി..

തങ്കക്കുടത്തിനെ വാരിയെടുത്ത് മുത്താനാവാതെ

മാതൃ ഹൃദയം തേങ്ങുന്നുണ്ടാവും.

വൃശ്ചികക്കാറ്റടിക്കുമ്പോഴുള്ള ആ മൂളല്‍

ചങ്ക് പൊട്ടിയുള്ള തെങ്ങുകളുടെ തേങ്ങലാണത്രെ.

കവുങ്ങുകൾ കാവടിയെടുക്കും.

ആടിയാടി പരസ്പരം പുണരും.

ഒരു വര്ഷത്തെ കാത്തിരിപ്പ്, ഒരു 'കിസ്സ്‌ ഓഫ് ലൗ',

അതെ അതൊരു ചുംബന സമരമാണ്.

തങ്ങളെ അകറ്റി നിര്ത്തിയവരോടുള്ള

മധുരപ്രതിഷേധം.

ഇക്കരെയാണെങ്കിലും 

ചിറിയും തൊലിയുമൊക്കെ പൊട്ടുന്നുണ്ട്.

വാസലിൻ  തേച്ചു നോക്കട്ടെ..